स्थानीय तहहरुले आगामी आर्थिक वर्ष २०८०।८१ को वार्षिक नीति, कार्यक्रम तथा बजेट ल्याउने मिति नजिकीदैँ जादाँ दार्चुलाको शैल्यशिखर नगरपालिकाले सुझाव संकलन गरिरहेको छ । 

नगरपालिकाले आइतबार अत्न्तरक्रियाको आयोजना गर्दै आगामी आर्थिक वर्षको नीति, कार्यक्रम तथा बजेट तर्जुमाको पुर्वसन्ध्यामा सरोकारवालासंग अन्तरक्रिया गरेको हो ।

शैल्यशिखर नगरपालिका योजना तथा अनुगमन शाखाको आयोजनामा आगामी आर्थिक वर्ष २०८०।८१ को नीति, कार्यक्रम तथा बजेट तर्जुमाका लागि सरोकारवालासंग सुझाव संकलन गरिएको शैल्यशिखर नगरपालिकाका प्रमुख विजयसिंह धामीले जानकारी दिए ।

चालु आर्थिक वर्ष २०७९।८० मा समेत सरोकारवालासंग सुझाव संकलन गरेरै नीति, कार्यक्रम तथा बजेट ल्याइएको स्मरण गर्दै नगरप्रमुख धामीले सोही अनूरुप कार्यान्वयनका लागि आफूहरुले प्रयास गरेको बताए । 

सुझाव संकलन कार्यक्रममा सहभागिहरुले गोकुलेश्वर बजारको फोहोरमैला व्यवस्थापन, चमेलिया नदीको संरक्षण, खानेपानीको व्यवस्थित रुपमा वितरण, शैक्षिक गुणस्तर सुधारका लागि पहल, चमेलिया नदीको किनारमा बस्दै आएका बादी बस्तीमा शौचालय र तटबन्ध निर्माण, बजार क्षेत्रमा सिसिटिभी क्यामेरा जडान गर्नुपर्ने लगायतका सुझाव राखेका थिए ।

शैल्यशिखर नगरपालिकाको सभाहलमा आयोजित सुझाव संकलन कार्यक्रममा शैल्यशिखर नगरपालिकाका नगरप्रमुख विजयसिंह धामी, नगर उपप्रमुख शान्ती खडायत लगायतका जनप्रतिनिधी, राजनितिक दलका प्रतिनिधी, नागरिक अगुवा, सुरक्षाकर्मी, पत्रकार, समाजसेवी, कर्मचारीहरुको सहभागिता रहेको थियो ।