दोस्रो राष्ट्रिय जेष्ठ नागरिक दिवस २०७९ देशभर विभिन्न कार्यक्रम गरि मनाइदैं छ । 

यसैबिच दिवसको अवसर पारेर दार्चुलाको शैल्यशिखर नगरपालिकाले जेष्ठ नागरिकलाई सम्मान गर्नुका साथै ओमशान्ती वृद्धाश्रममा बस्ने जेष्ठ नागरिकलाई न्यानो कपडा (कम्बल) तथा फलफूल वितरण गरेको छ । 

शैल्यशिखर नगरपालिका महिला, बालबालिका तथा जेष्ठ नागरिक शाखाको आयोजनामा वडा नम्बर ९ गोकुलेश्वरस्थित ओमशान्ती वृद्धाश्रममा एक कार्यक्रमको आयोजना गरि जेष्ठ नागरिकहरुलाई सम्मान गरिनुका साथै वृद्धाश्रममा बस्नु हुने ८ जना जेष्ठ नागरिकलाई कम्बल वितरण गरिएको महिला, बालबालिका तथा जेष्ठ नागरिक शाखा प्रमुख रजनी पाल (चन्द) ले जानकारी दिएका छन् । 

कार्यक्रममा शैल्यशिखर नगरपालिकाका  महिला, बालबालिका तथा जेष्ठ नागरिक शाखा प्रमुख पालले जेष्ठ नागरिकको सम्मान तथा सामाजिक सुरक्षाका लागि आगामी दिनमा थप कामहरु गर्न आफूहरु तत्पर रहेको बताएका छन् । 

नेपाल सरकारले विक्रम संवत् २०५१ साल पुष ११ गते नेपालमा सामाजिक सुरक्षा अन्तर्गत वृद्धभत्ताको सुरुवात गरिएको दिनको स्मरणमा गत वर्षदेखि राष्ट्रिय जेष्ठ नागरिक दिवस मनाउन थालिएको हो ।