पूर्वमन्त्री गणेशसिंह ठगुन्नाले लेकम गाउँपालिकास्थित कुणीमा निर्माणाधीन रहेको सुदूरपश्चिमकै ठूलो चमेलिया लिफ्टीङ खानेपानी योजनाको अनुगमन गरेका छन् । आसन्न संसदीय निर्वाचनमा दार्चुदाबाट प्रतिनिधि सभा सदस्य उम्मेदवार समेत रहेका ठगुन्नाले गाउँपालिकाको वडा नम्बर १ र २ मा पर्ने निर्माणाधिन खानेपानी योजनाको स्थलगत निरीक्षण गरेका हुन् । 

चुनावी प्रचारप्रसारको क्रममा लेकम पुग्नुभएका उम्मेदवार ठगुन्नाले योजनाको प्रगति अवस्थाबारे जानकारी लिएका हुन् । 

उनले वर्षौदेखि खानेपानी अभावमा समस्या झेल्दै आएका लेकमबासीको लागि गौरबको योजनाको रुपमा खानेपानी योजना अघि बढेको बताए ।

लेकम क्षेत्रका १ हजार ४ सय घरधुरीमा खानेपानी पुर्याउने गरी निर्माण कार्यअघि बढेको प्रतिनिधिसभा उम्मेदवार गणेशसिह ठगुन्नाले बताउनुभयो । " निकै मेहनत गरि सुख्खाग्रस्त क्षेत्रमा खानेपानी पुर्याउँदैछौ । खानेपानी नभएर वस्ती छोड्नुपर्ने अवस्थाको अन्त्य हुँदैछ ।" ठगुन्नाले थपे, "लेकम मात्र नभई आफु सांसद भएको बेला लिफ्टीङ र पम्पिङ खानेपानीमार्फत मालिकार्जुनको न्वालपानी, शैल्यशिखरको काडापारी, बन्तोली, लगायतका विकट वस्तीमा खानेपानी पुगेको छ ।"

दार्चुला सदरमुकाम खलंगामा साना सहरी खानेपानी सञ्चालन गरिएको छ । यहाँका ग्रामीण बस्तीहरुमा एक घर एक धारा योजनाहरु सञ्चालनमा रहेका छन् ।

"लेकम क्षेत्रलाई सडकले जोड्ने गरी निर्माण कार्य भइरहेको छ । लेकमको मुहार फेर्न अब धेरै समय लाग्दैन् ।" उनले भने, "सम्बृद्ध लेकम बनाउन हामी प्रतिबद्ध छौ ।"

यस्तै प्रदेशसभा १ का उम्मेदवार हरदेव जोशीले आफ्नो निर्वाचन क्षेत्रभित्र निर्माण सम्पन्न बाँकी रहेका योजनाहरु आफ्नो कार्यकालमा पूरा गर्ने बताए। "तपाई हामीलाई मत दिएर जिताउनुहोस ।" उनले भने, "एमालेले सुरु गरेका र गर्न बाँकी काम पूरा गर्न बचनबद्ध छौ ।" 

प्रतिनिधिसभा उम्मेदवार गणेशसिंह ठगुन्ना र प्रदेशसभा उम्मेदवार हरदेब जोशी नेतृत्वको टोली आज कौली हुँदै लाली पुग्ने योजना रहेको नेकपा एमाले दार्चुलाले जनाएको छ ।

यस्तै प्रदेशसभा २ का उम्मेदवार रामदत्त जोशी नेतृत्वको टोली नौगाड गाउपालिका वडा नम्बर २ दल्लेख भारानी, चौरीगाउँ, गोदानी हुँदै वडा नम्बर ३ कैदमलेक, देउलाडमुल हुँदै खार पुगेको छ ।