धामीगाउँमा पहिलो पटक बिजुली पुग्यो, अध्यक्ष जोशीले मनाए स्थानीयसित दीपावली

दशकौंदेखि अन्धकारमय डिलासैनी गाउँपालिकाको केन्द्र समेत रहेको वडा नम्बर ७ स्थित धामीगाउँमा पहिलोपटक लक्ष्मी पूजाको साँझ बिजुली बत्ती बलेको छ ।

डिलासैनी गाउँपालिकाको 'उज्यालो डिलासैनी अभियान' अन्तर्गत गाउँपालिकाको केन्द्र धामीगाउँ सहित आसपासका क्षेत्रमा पहिलो पटक गाउँमा बिजुली बत्ती बल्दा स्थानीय हर्षित भएका छन् ।

लक्ष्मीपूजाको अवसर पारेर आज वडा नम्बर ७ का बसन्तपुर, धामीगाउँ लगायतका स्थानमा ११ केभिए मुख्य लाइनमा विद्युत प्रसारण गरिएको डिलासैनी गाउँपालिकाले जनाएको छ ।

यसैबिच गाउँपालिका अध्यक्ष सन्तोषप्रकाश जोशी, गाउँपालिका प्रवक्ता यज्ञराज भट्ट सहितको टोलिले गाउँपालिकाको केन्द्र रहेको धामीगाउँमा पहिलोपटक विद्युत प्रसारण भएको खुसीयालीमा यस वर्षको दीपावली डिलासैनी गाउँपालिकाको कार्यालयमा मनाएका छन् ।