नेपाल प्रहरीले आफ्नो ६७ औं स्थापना दिवस दार्चुलासहित देशभर विभिन्न कार्यक्रम गरि मनाएको छ । 

देशैभरका प्रहरी इकाईहरुले सोमबार (आज) विविध कार्यक्रम गरी प्रहरी दिवस मनाएका हुन् । दार्चुलामा जिल्ला प्रहरी कार्यालयका प्रमुख तर्कराज पाण्डेयले प्रहरी महानिरीक्षक धिरज प्रताप सिंहको शुभकामना सन्देश पढेर सुनाएका थिए । 

६७ औं प्रहरी दिवसको अवसरमा जिल्ला प्रहरी कार्यालय दार्चुलाले विभिन्न व्यक्ति, प्रहरी कर्मचारी र सहिद परिवारलाई सम्मान गरेको छ । जिल्ला प्रहरी कार्यालय दार्चुलामा कार्यरत प्रहरी निरीक्षक राजेश शाहीसहित ३ जना प्रहरी कर्मचारी सम्मानित भएको प्रहरी प्रमुख एवम् प्रहरी नायव उपरीक्षक तर्कराज पाण्डेयले जानकारी दिए ।

सम्मानित हुनेमा जिल्ला प्रहरी कार्यालय दार्चुलामा कार्यरत प्रहरी निरीक्षक राजेश शाही, सामुदायिक प्रहरी सेवा केन्द्र बाङ्गाबगरका प्रहरी सहायक निरीक्षक दान बहादुर साउँद र प्रहरी जवान रोहित कुमार रोकाया रहेका छन् । 

६७ औँ प्रहरी दिवसको अवसरमा आयोजित एक समारोहमा प्रमुख जिल्ला अधिकारी दीर्घराज उपाध्यायले प्रमाणपत्रसहित उनीहरुलाई सम्मानित गरेका हुन् ।

यस्तै कर्तव्य पालनका सिलसिलामा अमरत्व प्राप्त गर्ने १४ सहिद परिवारलाई सम्मान गरिएको छ । नेपाल प्रहरीमा कर्तव्यको सिलसिलामा निधन भएका अमर प्रहरीप्रति श्रद्धाञ्जलि अर्पण गरि परिवारलाई कदर पत्र दिएर सम्मान गरिएको प्रहरी प्रमुख पाण्डेयले बताए ।  

दिवसका अवसरमा जिल्ला प्रहरी कार्यालय दार्चुलाले ९० वर्षीय भुतपूर्व प्रहरी जवान दिलानन्द बडूलाई समेत सम्मानित गरेको छ ।