दार्चुला : महाकाली लोकमार्ग अन्तर्गत शैल्यशिखर नगरपालिका ६ उल्लानीमा भएको जीप दुर्घटनामा ज्यान गुमाउने पाचैं जनाको शव बझाङ पठाउने तयारी भएको छ । 

बुधबार गोकुलेश्वरबाट दार्चुला सदरमुकाम खलंगातर्फ जाने क्रममा म १ ज ५५१ नम्बरको जीप दुर्घटनामा हुँदा बझाङको बुंगल नगरपालिकाका ५ जनाले ज्यान गुमाएका थिए भने चालकसहित जीपमा सवार ९ जना घाइते भएका छन् । 

शैल्यशिखर नगरपालिकाले ६० लिटर डिजेल र ५० हजार रुपैंया नगद तिरेर गाडी भाडामा लिइ शवहरुलाई बझाङ  पठाउने तयारी भएको नगरपालिकाले जनाएको छ । 

मृतक हिक्मत जागरी, पुने बोहरा, उजाले बोहरा, रैभान बोहरा र चम्फा बोहराको शवलाई शैल्यशिखर नगरपालिकाको सहयोगमा आफन्तहरुको जिम्मा लगाउन बिहिबार (आज) बझाङ पठाइने शैल्यशिखर नगरपालिकाका निमित्त प्रमुख प्रशासकीय अधिकृत शेखरचन्द्र ओझाले जानकारी दिएका छन् ।

सो दुर्घटनामा हिक्मत जागरी, पुने बोहरा, उजाले बोहरा, रैभान बोहरा र चम्फा बोहराको मृत्यु भएको थियो। रैभान र चम्फा श्रीमान–श्रीमती हुन् । 

दुर्घटनामा उनीहरुसँगै गएका छैठौं व्यक्ति धनबहादुर जागरी भने भाग्यवस् बाच्न सफल भएका छन् । घाइते अवस्थामा रहेका उनको गोकुलेश्वर अस्पतालमा उपचार पश्चात्  अहिले आफ्नो घर बुंगल फर्किने तयारीमा छन् । 

धनबहादुर सहित मृतक पाचैं जना रोजगारीकोे खोजिमा दार्चुलाको बाटो हुँदै भारतको धारचुलातर्फ जादैँ थिए ।

जीप अनियन्त्रित भएपछि सडक सतहदेखि करिब २५० मिटर तल खसेको थियो। ५ जनाको सिट पास रहेको जीपमा १४ जना सवार रहेको पाइएको छ।  दुर्घटनाबारे अनुसन्धान भइरहेको प्रहरीले जनाएको छ।