जोमसोम जानको लागि थासाङ गाउँपालिकाको रुट भएर जानुपर्छ । गाउँपालिकाका उपाध्यक्ष सोमलाल हिराचनका अनुसार नजिकैको गाउँका स्थानीयले लेतेसम्म विमान उडेको आवाज सुनेका रहेछन् । उनले नेपाल प्रेससँग भने, ‘यहाँको स्थानीयको अनुसार एक-डेढ घण्टाअघि यही रुट हुँदै उडेको हो रे । तर, माथि जोमसोम नपुगेको कुरा भयो । गाउँपालिकाबाट माथि गइसकेको थियो ।’ यहीँ बीचतिर कतै दुर्घटना भएको आशंका स्थानीयको छ । लेतेबाट जोमसोम ७ मिनेटको दूरीमा छ । उपाध्यक्ष हिराचनका अनुसार कालीगण्डकीको तीरैतीर गयो भने ठोकिने ठाउँ कुनै छैन । बादल लागेको कारणले कालीगण्डकीको साइड नगइ यतैतिर गएको हुनसक्ने उनको अनुमान छ । उनले भने,‘निलगिरीको साइडतिर मार्चे भन्ने लेकतिर जानसक्छ । कुन्जोको स्थानीयले देखेका थिए । यस्तो मौसममा पनि कसरी प्लेन आयो होला भनेर यहाँको स्थानीयले कुरा पनि गर्नुभएको थियो । माथि चाहीँ खुल्ला होला तल भुँइतिर मात्रै बादल होला भनेर सोच्नुभएको रहेछ ।’ कुन्जोबाट लेते वल्लो गाउँ र पल्लो गाउँमा पर्छ । मुस्ताङका प्रमुख जिल्ला अधिकारी नेत्रप्रसाद शर्माले दुर्घटना भएको पुष्टि गर्ने कुनै क्लु फेला नपरेको बताए । उनले नेपालप्रेससँग भने, ‘विमान मुस्ताङमा नै हराएको भन्ने छ । तर, दुघर्टना नै भएको भनेर पुष्टि गर्ने कुनै क्लु भेटिएको छैन ।’ उनका अनुसार विमानको खोजीका लागि सबै संयन्त्र परिचालन भइसकेको छ ।