'क्या दिएई गणतन्त्र तैंले, दुनियाँ हसाएई'
Wide Nepal News
आइतबार, चैत ०८, २०७७
नीति हरायो राजनितीको, नैतिकता नेताको ।
न्याय हरायो अदालत को, भरोसा जनताको ।।
अख्तियार बन्धक बन्यो, न्यायमुर्ती गोटी ।
नेतानका कम्पनी जसा, एई देश का पार्टी ।।
इसारा माइ आयोग चल्न्या, गणतन्त्र इसोई छ ।
नैत नियम नैत कानुन, बलिया कि बसाई छ ।।
कर्म भुल्ने कर्मचारी, गन भुल्ने सिकारी ।
नीति भुल्ने राजनेता, यी त हुन बिकारी ।।
पालै पालो सडकमाइ, हुल का हुल निस्क्या छन ।
खेल चल्या झैं फुटवल को, दुनियां हेय्रा छन ।।
क्या का लागि यो गाईजात्रा, जो आयो उसाइ हुन ।
लोभी पापी भ्रष्टाचारी, अपराधी जसाई हुन ।।
बर्दीया का बाघ जसा, माँसाहारी नेता ।
सौंराहा का हात्ती जसा, मोटायाका नेता ।।
भाषण यिन्को बिकाश को, सम्पती जलौंन्या ।
बाँचा यिन्को सम्बृधी को, गरीब लाई रुऔंन्या ।।
दीन का दीन सडकमाइ, मन पर्दी करौंन्या ।
पेसा धन्दा गर्न्यां जति, जाँ का ताई डरौंन्या ।।
आफै बोक्सी आफै धामी, हेर्न रमाईलो छ ।
सुवा रटाई सडक माई, भेडान्को गोईरो छ ।।
जन्तापन पटमुर्खै हुन, हुल का हुल दौंड्याछन ।
बिवेक माथी बिर्को कसी, नौंटँकी बन्यांछन ।।
राम नाम जपि भजन गाउंन्या, सुवा कि रटान छ ।
जाँ हरियो ताई दौंडन्यां, झोल्यान्की बथान छ ।।
सत्ता पक्ष पालै पालो, य्राली निकाल्दै छ ।
प्रतिपक्ष गहिरो निन्द्रा, सपना बुन्दैछ ।।
योई होकि राजनिती तिम्रो, कुटनिती आखिर ।
दुएई हातमाई लड्डु समाई, कुर्सी का खातिर ।।
इसोई होकि राजनिती कपटी कुटनिती ।
मौंका हेरी चौका हान्न्यां, फेला पय्रा जति ।।
तानातान छ सत्ता कि लाई, नेता कुर्सी भोगी ।
जन्ता लाई पटमुर्ख बनाई, नेता बन्यां ढोगी ।।
क्या दिएई गणतन्त्र तैले, दुनियां हसाएइ ।
कल्पना का सागरमाइ नेपाल डुबाएइ ।।
- खडक बम (कालापानीबाट साभार)
बिहिबार ०३, असोज २०८१ ०७:३०
प्रतिक्रिया