गोकुलेश्वर : इलाका प्रहरी गोकुलेश्वरको आयोजनामा दार्चुलाको शैल्यशिखर नगरपालिका ९, गोकुलेश्वर बजारका विभिन्न स्थानमा वृक्षारोपण गरिएको छ । इलाका प्रहरी कार्यालय गोकुलेश्वरद्वारा मंगलबार (आज) स्वास्थ्य मापदण्डको पालना गरि गोकुलेश्वर माद्यमिक विद्यालय, शैल्यशिखर नगरपालिकाको पूरानो भवन तथा गोकुलेश्वर प्राथमिक अस्पताल लगायतका स्थानमा वृक्षारोपण गरिएको इलाका प्रहरी कार्यालय गोकुलश्वरले जनाएको छ । गोकुलेश्वरका प्रहरी निरिक्षक अरुण बमका अनुसार आज गोकुलेश्वर बजारका विभिन्न स्थानमा २ सय बोट रोपिएका छन । पछिल्लो समय मनसुन शुरु भएसंगै देशका विभिन्न स्थानमा बाढी, पहिरोका घटना बढ्न थालेपछि वृक्षारोपण गरिएको हो । इलाका प्रहरी कार्यालय गोकुलेश्वरले आयोजना गरेको वृक्षारोपणमा शैल्यशिखर नगरपालिकाका प्रमुख प्रशासकिय अधिकृत सुरेन्द्र बहादुर बिष्ट, वडा नम्बर ९ का वडाध्यक्ष रामधनी बिष्ट, बजार व्यवस्थापन समितीका अध्यक्ष करन भण्डारी, गोकुलेश्वर माद्यमिक विद्यालयका व्यवस्थापन समितिका अध्यक्ष जगदिश बिष्ट सहित शिक्षक, स्वास्थ्यकर्मी, समाजसेवी, राजनितिक दलका नेता तथा कार्यकर्ता स्थानीयको सहभागिता रहेको प्रहरी निरिक्षक बमले जानकारी दिएका छन ।