दार्चुला : दुहुँ गाउँपालिकामा गत भदौ १३ गते आएको बाढी पहिरोमा आफन्त एवं घरबार गुमाएका पीडितको सहयोगार्थ 'सोसियल भोलेन्टियरस ग्रुप' दार्चुलामार्फत तीन लाख ९५ हजार बढी आर्थिक सहयोग संकलन भएको छ । अधिवक्ता कृष्ण महराको नेतृत्वमा देश, विदेशमा रहेका सहयोगी मनहरुले बाढी पहिरो पीडितका लागि तीन लाख ९५ हजार ३३ रुपैँया सहयोग गरेका हुन् । 'सोसियल भोलेन्टियर ग्रुप' दार्चुलामार्फत स्वस्फुर्त रुपमा शनिबारसम्म आर्थिक, नैतिक र भौतिक सहयोग गरी दुःखमा साथ दिने, सहयोग गर्ने स्वदेश तथा विदेशमा बस्ने सम्पुर्णलाई अधिवक्ता महराले आभार एवं कृतज्ञता ज्ञापन गरेका छन । सामाजिक सञ्जाल फेसबुकमार्फत आर्थिक हिसाब सार्वजनिक गर्दै महराले लेखेका छन् , "बाढी र पहिरोले सारा श्रीसम्पति बगाई उठिबास लगाएको दुःखद घडीमा यहाँहरुले मनैदेखि गर्नुभएको सहयोग र दिनुभएको साथप्रति व्यक्तिगत रुपमा म सधैं ऋणी एवं कृतज्ञ रहनेछु ।" हालसम्म दुहुँका बाढी–पहिरो पीडितका लागि संकलन भएको तीन लाख ९५ हजार तेत्तीस रुपैँया पैसट्ठी पैसा दुहुँबासी आम बाढीपीडित, दुहुँ गाउँपालिका हिकिला, वडा नम्बर २ र ५ लगायत सरोकारवाला अन्य निकायहरुसंगको समन्वय र सहकार्यमा वितरण गरिने उनले जानकारी दिएका छन् । संकलित रकममध्ये अमेरिकाबाट ८९ हजार १६९ रुपैया, मलेशियाबाट ५५ हजार ६२० रुपैया, दुबैईबाट २९ हजार ६५५ रुपैया, जापानबाट १३ हजार ८३७ रुपैया, भारतबाट आठ हजार रुपैया, अष्ट्रेलियाबाट सात हजार नौँ रुपैया, कुबेतबाट दुई हजार रुपैया र बाँकी नेपालबाट एक लाख ८९ हजार ७३५ रुपैया गरेर जम्मा तीन लाख ९५ हजार ३३ रुपैया संकलन भएको महराले बताए । "विदेशको प्रचण्ड गर्मीमा काम गरेर होस् वा स्वदेशमै आफ्नो एक महिनाको खाजा खर्च कटाएर होस्, यहाँहरुले लगाउनु भएको गुन हामी दुहुँबासीहरुको मन मनमा बस्नेछ ।", महराले भने, "सदा अविस्मरणीय रहनेछ । बाढीको क्षतिले मन रोएपनि बाढी–पहिरो पीडितहरुको सहयोगार्थ आर्थिक सहयोग संकलन अभियानको नेतृत्व गरी मेरा छिमेकी आम दुुहुँबासी आमाबुवा–दाजुभाई दिदिबहिनीहरुलाई दुःखको बेला साथ दिन पाउँदा खुसी लागेको छ ।" हालसम्म ६१ जनाले आर्थिक सहयोग गरेका छन् । आर्थिक सहयोग गर्ने, बाढी पहिरो पिडितको उद्धार, राहात र पुनस्थापनाका लागि खटिने तथा आर्थिक, भौतिक, नैतिक सहयोग गर्ने सबैलाई अधिवक्ता महराले सामाजिक सञ्जालमार्फत धन्यबाद ज्ञापन गरेका छन् ।