सुदूरपश्चिम प्रदेशको बैतडी जिल्लाबाट पत्रकारिता गर्दै आइरहेका पत्रकार विनोदसिंह बिष्ट खेलकुद पत्रकारिता प्रोत्साहन पुरस्कारबाट सम्मानित हुने भएका छन् । राष्ट्रिय समाचार समिति (रासस) का बैतडी समाचारदाता बिष्टलाई नेपाल सरकार, युवा तथा खेलकुद मन्त्रालयले पत्रकारिताको माध्यमबाट खेलकुद क्षेत्रको विकासमा पुर्याएको योगदानको कदर गर्दै सम्मान गर्न लागेको हो । मन्त्रालयले आज एक विज्ञप्ती जारी गर्दै सुदूरपश्चिम प्रदेशबाट खेलकुदको विकास र विस्तारमा योगदान पुर्याएको भन्दै मन्त्रीस्तरबाट निर्णय भएबमोजिम विष्टलाई खेलकुद पत्रकारिता प्रोत्साहन पुरस्कारबाट सम्मान गरिने भएको हो । बिष्टलाई अगामी पुस ४ गते मन्त्रालयमै एक कार्यक्रमको आयोजना गरि नगद २५ हजार र प्रमाणपत्रसहित सम्मान गरिने जनाइएको छ । बैतडीको दोगडाकेदार गाउँपालिका ३ श्रीकोट घर भएका बिष्ट विगत १२ वर्षदेखि पत्रकारिता क्षेत्रमा क्रियाशिल रहेका छन् । सुदूरपश्चिमबाट बिष्टसंगै मन्त्रालयले अन्य प्रदेशबाट पनि एक/एक जनालाई सम्मान गर्ने भएको छ ।