दार्चुलाको शैल्यशिखर नगरपालिकाको प्रशासनिक भवन निर्माण कार्य अन्तिम चरणमा पुगेको छ । २०८० असारबाट निर्माण सुरु भएको नगरपालिका भवन अन्तिम चरणमा पुगेको हो । तत्कालिन गाउँ विकास समितिको भवन भएकै ठाउँमा सुविधासम्पन्न भवन निर्माण कार्य भएको छ । एक महिनाभित्रै भवन निर्माण सकिने प्रमुख प्रशासकीय अधिकृत सुरेन्द्र बहादुर विष्टले जानकारी दिए । विष्टका अनुसार स्थानीय पुर्वाधार विभाग र शैल्यशिखर नगरपालिकाको साझेदारीमा कुल १० करोड १९ लाख ६४ हजार ३४२ रुपैयाँ लागतमा भवन निर्माण भइरहेको हो । दुई वर्षभित्रै निर्माण सक्ने गरी सम्झौंता भएको थियो । सम्झौंताअनुसासार निर्माण कार्य भइरहेको छ । भवनमा रङ्गरोगन लगाउने काम भइरहेको छ । भवनभित्र ¥यालिङ राख्ने तथा भवनको आगनमा सेलेट राख्ने कार्य चलिरहेको छ । निर्माण व्यवसायीले समयमै भवन निर्माण गरिरहेको छ । झ्याल ढोका फिटिङ गर्ने काम भइरहेको छ । मङ्सिरमा नयाँ कार्यालयबाट सेवा दिने गरी निर्माण व्यवसायीलाई ताकेता गरेका छौं, विष्टले भने । भवन नहुँदा नगरपालिकाले नौ वर्षदेखि भाडाका भवन प्रयोग गरि सेवा प्रवाह गरिरहेको छ । वडा तथा पालिकाको भवन भाडामै मासिक लाखौं रकम खर्च भइरहेको छ । स्थानीय तह निर्वाचनको पहिलो कार्यकाल (२०७४–२०७८) को अवधिमा नगरपालिकाको भवन निर्माण गर्न सकेन् । यो समयमा न वडा कार्यालय भवन बने, न नगरपालिकाको प्रशासकीय भवन कार्य बन्यो । २०७९ सालमा आएका जनप्रतिनिधिले प्रशासकीय भवन निर्माण पहिलो संकल्प गरेर काम अघि बढाएको नगर प्रमुख विजयसिह धामीले बताए । ‘सधैं भाडाका भवनमा बसेर लाखौं रकम खर्च गर्नुभन्दा दीर्घकालिन समयसम्म प्रयोग गर्न सकिने भन्दै प्रशासकीय भवन निर्माण प्राथमिकतामा राख्यौं । जसअनुसार मेरै कार्यकालमा प्रशासकीय भवन निर्माण भएको छ ।’ दार्चुला सदरमुकाम खलंगापछि दोस्रो बन्दै गरेको बजार गोकुलेश्वर हो । दार्चुलाको प्रवेशद्धार समेत भएको कारण यो क्षेत्रमा बजारीकरण बढ्दै गएको छ । अहिले भाडाको भवनमा कर्मचारीलाई कहाँ बसेर सेवा दिने भन्ने सकस छ । सडकमै भएको कारण कर्मचारीलाई निकै चूनौति पनि थियो । धामीका अनुसार भवन निर्माणपछि दुई वटा सुविधासपम्पन्न सभाहलसहित सुविधायुक्त कार्यालय बन्ने छ । कृषि तथा पशु शाखाको लागि अलग्गै भवन निर्माण भइसकेको छ । अरु शाखाहरुको लागि नयाँ प्रशासकीय भवन प्रयाप्त हुने धामीको भनाई छ । चार वडा कार्यालय भवन निर्माण ९ ओटा वडा रहेका नगरपालिकाका चार ओटा वडाहरुमा वडा कार्यालय भवन निर्माण भएको छ । तीन वर्षको अवधिमा वडा भवन नभएका वडा नम्बर ३, ५, ७ र ८ मा वडा कार्यालय भवन निर्माण भएको हो । पाँच वटा ओडा कार्यालयहरु साविकका गाउँ विकास भवनमा सञ्चालन भएका छन् । अहिले नगरपालिकामा निर्माण भएका चार वटा ओडा कार्यालयमध्ये तीन वटा ओडा कार्यालय भवन सञ्चालनमा आइसकेको छ । वडा नम्बर ५, ७ र ८ ले नयाँ भवनबाट सेवा सुचारु भएको नगर प्रमुख विजयसिह धामीले जानकारी दिए । वडा नम्बर ३ को भवन निर्माण पूरा भएको भए पनि कार्यालय सञ्चालनमा आउन बाकी छ । भवन नहुँदा व्यक्तिगत घर भाडामा लिएर सेवा दिनुपर्दा सेवाग्राहीलाई समेत सास्ती खेप्दै आएको अहिले आफ्नै भवन हुँदा सेवामा प्रवामा सहजता आएको वडा नम्बर ५ का वडा अध्यक्ष जनकसिह डागाले बताए । नगरभित्रका सबै वडा कार्यालयका आफ्नै कार्यालय भवन बनाउने उद्देश्यसहित काम भएको हो । जसअनुसार वडा नम्बर ९ को तत्कालिन गाविस भवनमा नगरपालिका भवन निर्माण गरिएको छ । ९ नम्बर वडा कार्यालय भवन अहिले भाडाको भवनमा सञ्चालनमा छ । यो वडालाई पनि सरकारी भवनमा सार्ने तयारी गरिएको विष्टको भनाई छ ।