आगामी बैशाख ३० मा सम्पन्न हुने स्थानीय तहको निर्वाचनका लागि नेकपा एमाले दार्चुलाले जिल्लाका तीन वटा स्थानीय तहमा आफ्ना उम्मेदवारको टुङ्गो लगाएको छ । जिल्लाको शैल्यशिखर नगरपालिका, दुँहु गाउँपालिका र नौगाड गाउँपालिकामा पालिका प्रमुख तथा अध्यक्ष पदका उम्मेदवारको टुंगो लागेको एमाले दार्चुलाले जनाएको छ । शैल्यशिखर नगरपालिकामा नेकपा एमालेको तर्फबाट नेकपा एमालेका जिल्ला कमिटी सदस्य विजयसिंह धामीलाई नगरप्रमुख पदमा उम्मेदवार बनाउने सहमति जुटेको छ । यस्तै जिल्लाको नौगाड गाउँपालिका अध्यक्षमा एमाले दार्चुलाका अध्यक्ष समेत रहेका प्रेमसिंह धामीलाई पुन दोहोर्याउने तयारी थालिएको र दुहुँ गाउँपालिकामा एमाले नेता नरेन्द्रसिंह बडाललाई गाउँपालिका अध्यक्षमा उम्मेदवार बनाउने टुंगो लागेको बताइएको छ । अन्य पालिकामा पनि उम्मेदवार छनोटको विषयमा छलफल भइरहेको नेताहरुले बताएका छन् । २ नगरपालिका र ७ गाउँपालिकासहित जम्मा ९ वटा स्थानीय तह रहेको दार्चुलामा यसअघि वि.सं.२०७४ सालमा सम्पन्न स्थानीय तहको निर्वाचनमा ५ वटा स्थानीय तहमा नेपाली कांग्रेश, ३ वटामा नेकपा एमाले तथा एक स्थानीय तहमा नेकपा माओवादी केन्द्र विजयी भएको थियो ।