नेपाल भारत विकास सहयोग अन्तरगत निर्माण भएको दार्चुलाको शैल्यशिखर नगरपालिका वडा नम्बर ८ मा अवस्थित गलैनाथ मावि झरकाँडाको विद्यालय भवन उद्घाटन तथा हस्तान्तरण कार्यक्रम सम्पन्न भएको छ ।

शैल्यशिखर नगरपालिकाका नगरप्रमुख विजय सिंह धामीको अध्यक्षता एंव दार्चुलाबाट निर्वाचित प्रतिनिधि सभा सदस्य, पूर्वमन्त्री दिलेन्द्र प्रसाद वडूको प्रमुख आतिथ्यता र पूर्वमन्त्री गणेशसिंह ठगुन्नाको विशिष्ट आतिथ्यतामा विद्यालय भवन उद्धघाटन गरिएको हो ।

विद्यालय भवन उद्घाटन तथा हस्तान्तरण कार्यक्रममा भारतीय राजदुतावास काठमाडौंका काउन्सलर अविनास कुमार सिंह, शैल्यशिखर नगरपालिकाका उप-प्रमुख शान्ती खडायत, प्रशासकीय अधिकृत सुरेन्द्र बहादुर बिष्ट, एमाले दार्चुलाका पूर्वअध्यक्ष रामदत्त जोशी, वडाअध्यक्षहरु, विव्यस अध्यक्ष धनराम जोशी, प्रधानाध्यापक, शिक्षक, अभिभावक, सुरक्षाकर्मी, सञ्चारकर्मी लगायतको आतिथ्यता रहेको थियो ।

करिव ४ करोड बजेटमा निर्माण गरिएको विद्यालय र कार्यालय भवन निर्माणमा भारतीय राजदुताबासको ८० प्रतिशत र शैल्यशिखर नगरपालिकाको २० प्रतिशत लगानी रहेको छ ।

कार्यक्रमका बक्ताहरुले विद्यालय भवन निर्माणमा सहयोग गर्ने भारतीय राजदुतावास, पहलकर्ता, नगरपालिका लगायत नेपाल सरकारलाई धन्यवाद ज्ञापन गरेका छन् । भवन निर्माणकार्य समयमै सम्पन्न गर्ने नमस्कार जेभी निर्माण सेवाका सञ्चालक सर्पराज वडूलाई पनि धन्यवाद सहित सम्मान गरिएको छ ।

कार्यक्रमका अध्यक्ष, प्रमुख अतिथि, विशिष्ट अतिथि र अतिथिहरूलाई समेत खादा, माला र सम्मानपत्रद्वारा सम्मानित गरिएको छ ।