दार्चुला सदरमुकाम खलंगा जोड्ने एक मात्र महाकाली लोकमार्ग चार दिन देखि अवरुद्ध बनेको छ ।   

सदरमुकाम नजिकै रहेको महाकाली नगरपालिका–५ किम्तडीको ठड्याकाटा भीरमा सडक अवरुद्ध बनेको हो ।

गत शुक्रबार सडक चौडा बनाउने क्रममा पहिरो खसेको थियो । पहिरोमा परि स्काभेटर चालक रेशम बुढामगर गम्भीर घाईते भए । स्काभेटर नदीमा फसेको छ । स्काभेटर चालकलाई नेपाली सेनाको हेलिकप्टरमार्फत धनगढी रिफर गरिएको थियो ।

एकमात्रै मुख्य राजमार्ग अवरुद्ध बनेपछि साना तथा ठूला सवारी साधन दुईतर्फ रोकिएका छन् । धनगढी, महेन्द्रनगर, काठमाण्डौंबाट आउने बस तथा जीपहरु किम्तडीबाट फर्किरहेका छन् । मालबाहक ट्रक रोकिएका छन् ।

खलंगामा रोकिएका बस, जीपहरु बसपार्कमा थन्किएका छन् । एम्बुलेन्स चल्न पाएको छैन् । बैकल्पिक मार्ग नहुँदा खलंगासम्मको आवतजावत ठप्प भएको छ । जिल्ला अस्पतालको एम्बुलेन्स किम्तडीमा रोकिएको छ । चार दिनसम्म सडक नखुलेपछि सर्वसाधारणले आवतजावतमा कठिनाई भोग्नुपरेको छ ।

जिल्ला प्रशासन कार्यालय दार्चुलाले महाकाली लोकमार्गको गोकुलेश्वर–खलंगा सडक खण्डको महाकाली नगरपालिका–५ स्थित ठड्याकाठा भीरमा सडक खुलाउन सडक डिभिजन बैतडीलाई पत्रचार गरेको छ । आइतबार कार्यालयलाई महाकाली लोकमार्ग मर्मत तथा सञ्चालन गर्न पत्रचार गरेको हो ।

प्रमुख जिल्ला अधिकारी यज्ञराज जोशीले सडक चौडा गर्ने क्रममा खसेको पहिरोले सदरमुकाम खलंगासम्म आवतजावतमा कठिनाई भई नागरिकको जनजीवन कष्ठकर भएको उल्लेख गरेका छन् । जिल्ला प्रशासन कार्यालयले उक्त पत्रलाई बोदार्थको रुपमा गृह मन्त्रालय र जिल्ला प्रहरी कार्यालयलाई समेत समन्वय सहजीकरणको लागि पठाएको छ ।

प्रशासनको पत्रचारपछि निर्माण व्यवसायीले सोमबार साझदेखि पैदल बाटो खुलाउने प्रयास गरेको छ । सडक पूर्णरुपमा सुचारु हुन भने केहि समय अझै लाग्ने जानकारी आएको प्रमुख जिल्ला अधिकारी यज्ञराज जोशीले बताए । तत्काल बाटो खुलाउने प्रयासमा लागेका छांै प्रजिअ जोशीले भने, सडक खुलाउन भने समय लाग्ने अवस्था देखिन्छ ।

दार्चुला सदरमुकाम खलंगा जोड्न बैकल्पिक सडकको रुपमा खार खलंगा गोकुलेश्वर सडक हो । तर यो सडकमा अहिले मर्मत सम्भारको कार्य चलिरहेको छ । सडक कालोपत्रे भएको छैन् । जसको कारण नागरिकले अहिले गाडी परिवर्तन गरेर गन्तव्यमा पुग्न बाध्य छन् ।

विद्यालय आउने बालबालिका जोखिममा

दार्चुला सदरमुकाम खलंगा जोड्ने एक मात्र महाकाली लोकमार्ग चार दिन देखि अवरुद्ध हुँदा सदरमुकाम खलंगामा अध्ययन गर्न आउने बालबालिका जोखिममा छन् । सदरमुकाम नजिकै रहेको ठड्याकाठामा सडक अवरुद्ध हुँदा बालबालिकाले जोखिम मोलेर आवतजावत गर्नुपरेको अभिभावकको गुनासो छ ।

महेन्द्र नमूना मावि खलंगा र एसियन अकाडमीको स्कुल बस रोकिएका छन् । जसको कारण धाप, दत्तु, किम्तडी, लगायतका ठाउँबाट आउने विद्यार्थी मार्कामा परेका छन् ।

विद्यार्थीलाई भीरको बाटो हिडाउदा निकै जोखिम भएको महेन्द्र नमुना मावि खलंगाका प्रधानाध्यापक दामोदर जोशी बताउँछन् । शिक्षक विद्यार्थीले भीरबाट हिड्नुपरेको छ । टाढाबाट दैनिक रुपमा विद्यालय आउने विद्यार्थीले चर्को शुल्क तिर्नुपरेको छ ।

बिहान ६ बजे विद्यालय लाग्छ । अध्यारोमै विद्यार्थीले भीरको बाटो चढेर आउँदा जोखिमपूर्ण अवस्था छ, प्रधानाध्यापक जोशीले भने, सडक खुलाउन भइरहेको ढिलाईले विद्यार्थीको पढाईमा समस्या हुने अवस्था आएको छ ।

दैनिक सयौं विद्यार्थी खलंगा अध्ययन गर्न आउने गर्छन् । झण्डै एक किलोमिटर पहिरो क्षेत्रमाथिबाट आवतजावत गर्न बाटो बनाइएको छ । माथिबाट तल हेर्दा सिधै महाकाली देखिन्छ,। विद्यार्थी, बृद्धबृद्धालाई रिंगटा लागेर समेत तल खस्ने अवस्था देखिएको अभिभावक बताउँछन् ।

विरामीलाई उपचारमा आउँजाउँमा कठिनाई

सदरमुकाम खलंगा नजिकै रहेको ठड्याकाठाभीरमा सडक चौडा पार्ने क्रममा गत शुक्रबार स्काभेटर चालक रेशम बुढामगर गम्भीर घाईते भए । प्रारम्भिक उपचारको लागि जिल्ला अस्पतालमा पु¥याइयो । तर जिल्लामा निको नहुने अवस्था आएपछि रेफर भनियो । तर रेफर गर्न बाटो थिएन् । जिल्ला प्रशासन कार्यालयले नेपाली सेनाको हेलिकप्टरमार्फत धनगढी पठायो ।

तर हेलिकप्टरमार्फत बाहिर लिन नसक्ने विरामीले भने अहिले पनि धौधौ गर्दै अस्पताल पुग्न बाध्य छन् । अस्पताल आउन ठड्याकाठा भीरमा पूरै हिड्नुपर्ने छ । जोखिम अवस्थामा बिरामी कसरी हिडेर आउन सक्छन्, महाकाली नगरपालिका–९ का प्रकाश सामन्तले भने, विरामी बाटोमै मर्ने अवस्था छ ।

अस्पतालमा जुनसुकै बेला गम्भीर खाले विरामी आउन सक्छन्, जिल्ला अस्पताल दार्चुलाका डाक्टर सञ्जीव श्रेष्ठले भने, यस्तो अवस्थामा बाहिर रेफर गर्न बाटो छैन् । सडक खुलाउन भइरहेको ढिलाईले विरामीलाई सास्ती छ । स्टेचरमै बोकेर पहिरो कटाउन पनि बाटोको अवस्था राम्रो छैन् ।

सडक खुलाउनतर्फ समयमै ध्यान नदिने हो, विरामीलाई उपचार गर्न समस्या हुने उनको भनाई छ ।