कर्णाली याक्समा शेखर धवन, सोमपालको कप्तानीमा खेल्ने

सम्बाददाता

शुक्रबार, कार्तिक ३०, २०८१

कर्णाली याक्समा शेखर धवन, सोमपालको कप्तानीमा खेल्ने

कर्णाली याक्समा आवद्ध भएका भारतीय क्रिकेटर शिखर धवनले सोमपाल कामीको कप्तानीमा खेल्ने भएका छन् । फ्रेन्चाइजका सहमालिक गृहेन्द्र घिमिरेले यसको पुष्टि गरे ।

एनपीएलमा हालसम्मको ठूलो खरिदका रुपमा कर्णालीले भारतीय राष्ट्रिय क्रिकेट टीमका पूर्वओपनर धवनलाई भित्र्याएको छ । धवनले कम्तीमा चार खेल खेल्ने घिमिरेले जानकारी दिएका छन् ।

टीमका मार्की खेलाडी (कप्तान) सोमपाल कामी हुन् । सोमपालकै कप्तानीमा धवनले एनपीएल खेल्ने घिमिरेले नेपाल प्रेसलाई बताए ।

‘यो विषयमा पहिल्यै समझदारी भएको छ । टीमको कप्तानीमा कुनै पनि परिवर्तन हुँदैन,’ उनले भने ।

सोमपालको कप्तानीमा खेल्ने विषयमा धवनले कुनै पनि आनाकानी नगरेको पनि गृहेन्द्रले सुनाए ।

‘उहाँले यसलाई सामान्य रुपमा लिनुभएको छ । फ्रेन्चाइज क्रिकेटमा विदेशी खेलाडीहरुले सबै खेल खेल्ने निधो नहुने भएकाले लोकल खेलाडीलाई नै कप्तानी दिने परिपाटी पनि छ,’ उनले भने ।

धवनको इन्ट्रीसँगै कर्णाली याक्सले चार जना विदेशी खेलाडीको न्यूनतम कोटा पूरा गरेको छ । थप एकजना खेलाडीसँग कुराकानी भइरहेको घिमिरेले जानकारी दिए ।