दार्चुलाबाट चीनको सीमा क्षेत्र ताक्लाकोट प्रवेशका लागि अनुमति पत्र वितरण सुरु गरिएको छ । 

जिल्ला प्रशासन कार्यालय दार्चुलाले चीन प्रवेशका लागि अनुमति पत्र ‘पास’ वितरण सुरु गरेको हो । कोरोना महामारीका कारण विगत ४ वर्षदेखि बन्द रहेको नेपाल–चीन सीमा नाका तिंकर हुँदै ताक्लाकोट प्रवेशको लागि पास वितरण सुरु भएको छ ।

दार्चुलाका राजनीतिक दल र व्याँस गाउँपालिकाका स्थानीयको लामो प्रयासपछि पहिलोपटक पास वितरण सुरु भएको हो । 

प्रमुख जिल्ला अधिकारी यज्ञराज जोशीले बिहीबार २ जनालाई प्रवेश अनुमति पत्र वितरण गरिएको जानकारी दिए । चीन प्रवेश अनुमति पत्र वितरण सुरु गरेका छौ,’ प्रमुख जिल्ला अधिकारी जोशीले भने, औपचारिक रुपमा नाका खुलेको छैन, तर, दुई देशबीच केहि समझदारी भएकाले प्रवेश पत्र जारी गरेका हौं । दुवै देशको समन्वयमा आउजाउ गर्न खुलाउने उच्चस्तरमा समझदारी भएको छ ।

गृह मन्त्रालयले पठाएको डिजाइनअनुसार जिल्लामै कार्ड छपाइ गरेर वितरण थालिएको छ । नेपाल–चीन सीमा क्षेत्रका बासिन्दा र नेपाली नागरिकताको प्रमाणपत्र भएका व्यक्तिले पास पाउनेछन् । प्रमुख जिल्ला अधिकारी जोशीका अनुसार व्यापारका लागि तिब्बत जान ७९ जनाले सिफारिस लिएका छन् ।

ढिलै भएपनि परराष्ट्र मन्त्रालयले जिल्ला प्रशासन कार्यालय दार्चुलालाई पत्रचार गरेपछि प्रवेशको लागि पास उपलब्ध भएको व्याँस गाउँपालिका–१ का स्थानीय योगेश बोहराले बताए । उनले भने, लामो संघर्षपछि बल्ल पास पाएका छौं । 

दुवै देशको सहजीकरणको आधारमा अब ताक्लाकोट गएर व्यापार गर्ने बाटो खुला भएको छ ।

ताक्लाकोटमा मात्रै दार्चुलाका व्यासीहरुको झण्डै तीन दर्जन बढि पसलहरु रहेका छन् ।