Wide Nepal News आइतबार १३, जेठ २०८१ ०५:३६

आजबाट बाहिरिँदैछन् राष्ट्रिय सभाका २० सांसद, नवनिर्वाचितको शपथ सोमबार

सम्बाददाता सम्बाददाता
आइतबार, फागुन २०, २०८०
आजबाट बाहिरिँदैछन् राष्ट्रिय सभाका २० सांसद, नवनिर्वाचितको शपथ सोमबार

राष्ट्रिय सभाका अध्यक्ष गणेश तिमिल्सिनासहित २० सांसद आइतबारबाट बाहिरिँदैछन्।

राष्ट्रपतिबाट निर्वाचित मनोनीत एकसहित राष्ट्रिय सभाका २० सांसदको पदावधि आजबाट सकिएको हो।

बाहिरिएका २० मध्ये १९ स्थानमा सांसद निर्वाचित भइसकेका छन्। मन्त्रिपरिषद्को सिफारिसमा राष्ट्रपतिले मनोनीत गर्ने कोटा भने पूर्ति भइसकेको छैन।

आजबाट पदावधि सकिनेमा एमालेका ८, कांग्रेसका ४, माओवादीका ३, एकीकृत समाजवादीका २ र जसपा, मनोनीत र स्वतन्त्र एक/एक जना छन्।

एमालेबाट राष्ट्रिय सभा अध्यक्ष तिमिल्सिनासहित इन्दु कडरिया, कुमार दसौंदी, दीपा गुरुङ, दिलकुमारी रावल (पार्वती), नरपति लुवार, भैरवसुन्दर श्रेष्ठ र रामचन्द्र राई राष्ट्रिय सभाबाट बिदाइ हुँदैछन्।

यस्तै कांग्रेसका रमेशजंग रायमाझी, जितेन्द्रनारायण देव, अनिता देवकोटा र प्रकाश पन्थको ६ वर्षे कार्यकाल सकिन लागेको ह

माओवादीका विना पोखरेल, हरिराम चौधरी र महेशकुमार महरा तथा समाजवादीका नन्दा चापागाईं र सिंगबहादुर विश्वकर्मा बिदाइ हुँदैछन्।

जसपाकी प्रमिला देवी, राष्ट्रपतिबाट मनोनीत विमला राई पौड्याल र स्वतन्त्र सांसद खिमलाल देवकोटाको पदावधि पनि आजै सकिँदैछ।

यी रिक्त स्थानका लागि माघ ११ गते सातै प्रदेशमा निर्वाचन भएको थियो।

कोशी प्रदेशको एक सिटबाहेक अरूतिर गठबन्धनका उम्मेदवार विजयी भए। 

कोशी प्रदेशबाट अन्यमा कांग्रेसका कृष्ण सिटौला र महिलामा एमालेकी रूक्मिणी कोइराला विजयी भएका छन्।

मधेसबाट महिला कोटामा जसपाकी पूजा चौधरी र अन्यमा कांग्रेसका आनन्द ढुंगाना विजयी भएका छन्।

बागमतीमा कांग्रेसबाट विष्णुदेवी पुडासैनी र जीतजंग बस्नेत, माओवादीबाट श्रीकृष्णप्रसाद अधिकारी र एकीकृत समाजवादीबाट घनश्याम रिजाल विजयी भए।

गण्डकीबाट माओवादीका मनरूपा शर्मा तथा कांग्रेसका पदमबहादुर परियार र किरणबाबु श्रेष्ठ विजयी भएका छन्।

लुम्बिनीमा कांग्रेसबाट विष्णुकुमारी सापकोटा र माओवादी केन्द्रका झक्कुप्रसाद सुवेदी विजयी भएका हुन्।

कर्णालीमा एकीकृत समाजवादीकी सावित्री मल्ल, माओवादीका विष्णुबहादुर विश्वकर्मा र कांग्रेसका कृष्णबहादुर रोकाय निर्वाचित भएका छन् भने सुदूरपश्चिममा कांग्रेसका बलदेव बोहोरा र नारायणदत्त भट्ट तथा माओवादीका रेणु चन्दले चुनाव जितेका छन्।

उनीहरूले पद तथा गोपनियताको शपथ सोमबार ग्रहण गर्नेछन्। नवनिर्वाचित सांसदहरूका लागि साढे ११ बजे पद तथा गोपनीयताको शपथ ग्रहण गराइने राष्ट्रिय सभाका प्रवक्ता एकराम गिरीले जानकारी दिए।

उनीहरूलाई उपाध्यक्ष उर्मिला अर्यालले शपथ ग्रहण गराउने प्रवक्ता गिरीले बताए

प्रतिक्रिया